【now.com財經】噚晚張家朗再度奪金，與對手門得難分難解，打緊張，睇的過癮；何詩蓓再次站上頒獎台上亦令人感動，期待你下一仗出戰再創佳績。另一方邊亦欣賞到拿度及祖高域大師級對決嘅一場單另網球，令人驚喜嘅係估唔到北韓嘅乒乓球原來咁強！
如果睇開美股嗰班，應該今日都無乜嘢，反正呢啲時間都未起身。但應該絕大部份嘅港人今日朝早都係如常的早起返工，希望你喺返工嘅車程上可以補一補眠。
睇返個市。噚日見指數企於小時圖中軸樓上，所以派出恒指牛(56189)應戰，平均買入價為0.048元。同步Set好借五分鐘圖10線作為下方量度線，有咩唔對路先閃為上。
喺下半場開始之後20分鐘，指數雖然仍然定住喺高位，不過擺位上見低走於10線，所以喺嚴守策略之下，(56189)需要離場。
如同平時一樣用10分鐘作為走貨時間的話，即於1點20分至1點30分走貨，按(56189)期內高低位做過0.062元/0.059元，即平均走貨價為0.0605元，呢一趟平均執12.5格或26.04%，已經唔係等收市咁簡單，直頭可以直接等放工再返屋企睇奧運。
今日為期結日，真係唔好以為期結日「老鳳」一定係升，睇返今日指數低開4x點之後，到依家10點指數跌幅擴大至逾200點，17,000點穿過嘅，所以首兩層牛證街貨又被全數收回，重新將16,900至16,999點嘅牛證街貨推返上變成最貼價牛證街貨層。
作戰室淡倉又見陸續收割，同時大家都留返一注風箏注喺度等睇指數確唔確認向下穿17,000點。
喺小時圖上見，依家10點10分，指數確認重新走返落中軸以下水平，Slow STC(14.3)兩線亦都保持向下，指數已經確認穿過17,000點但又真係未穿得實，喺小時圖借得到上個星期五(26日)尾段時間嘅低位，大約個範圍都係16,99X至17,00X點呢個水平，一旦確認穿過嘅話，見保歷加底線16,884點都唔出奇。
同步，指數再次走返靠近牛證街貨層，又嚟貼近重貨區之前，淡倉出動確實合理，只不過都要留意返五分鐘圖指數落到呢個位，都要小心一下佢會出Swing Trade可能。
喺五分鐘圖拉定底線，同作戰室一齊等過線，恒指熊(65311)，收回價17,400點，同現價有約388點，約40倍槓桿好刺激架，稍等Slow STC(14.3)彈返上超買位先出當然可以，進取嘅借五分鐘圖啲10/20線唔過而出都得，但提多句小心17,000點今日會打攻防戰(依家都打咗差不多半個鐘啦)
作者阿珊，以技術分析專心玩輪證，唔貪心，努力賺取我家肥貓罐罐。
