【Now財經台】加密貨幣短短幾年間，已成為今屆美國總統大選議題之一，反映重要性大幅提升，美國選舉設有「政治行動委員會」(PAC)制度，PAC會匯集組織成員嘅捐款，然後將資金捐畀競選活動等，所謂SUPER PAC，正式名稱係「僅獨立支出政治行動委員會」，SUPER PAC可以接受無限捐款，資金用途不限於競選活動，仲可以用喺廣告等商業活動，究竟幣圈對SUPER PAC有咩期望？幣圈組織成為最大SUPER PAC，對選舉又會產生乜嘢化學作用？
三星資產運用香港投資策略師鍾駿指，SUPER PAC可以無限支出及接受無限捐款，變相提升政治動態，因為喺選舉當中要得到SUPER PAC支持，就要同佢哋關係友好，其中，支持加密貨幣嘅組織Fairshake，已成為今屆選舉中規模最大嘅SUPER PAC，喺政治取態上，要放寬加密貨幣限制，先可以獲得Fairshke支持，令加密貨幣限制減少，間接利好幣圈嘅發展。
