【Now財經台】奇點國峰(01280)公同向包括控股股東兼主席袁力等一眾關連人士，收購內地培訓服務業務北京聖商100%股權，總代價3.4億元，交易將以發代價股支付，每股0.4元，較上周五(26日)收市價折讓19%，涉及新股相當於已發行股本47%。值得留恴係，公司其實兩年前已經想做呢單交易，當年收購作價近20億元，但最終未有進行。
《香港股票財技密碼》作者梁杰文指，對小股東嚟講，遲兩年買類似嘅業務，由約20億元變逾3億元，主要係目標公司盈利每況愈下，令估值大幅萎縮，加上至少有兩家同類上市公司可以比較，都好難攞到好誇張嘅估值，佢又話，始終今次買平咗一大截，小股東一定收貨。
Mike續指，對獨立股東嚟講未必有好大意義，加上公司近期做咗一個配股行動，咁短時間內又再做關連交易，如果用陰謀論去揣測，可能上次配股係為今次收購，召開股東特別大會時去投贊成票，有友好人士持有公司大量股份，預期即使小股東好積極投反對票，都好難推翻交易。
