【now.com財經】今屆奧運熱不遜於上屆，開幕無耐江旻憓率先奪金，睇返佢賽後訪問只係不斷咁講自己無再輸，而唔係終於贏；真心欣賞呢種心態，不過都真係唔好忘記仲有其他運動員喺比賽場上努力中，不論有無得獎、取得邊一個階段嘅成績，背後所付出嘅一定不會比其他人少。
經常喺作戰室同戰友講：先唔好諗住贏，要諗唔好輸先，因為Risk management > Take Profit，賬面上兩樣嘢好似一樣，但心態上係完全兩回事；Maybe同「得返番半杯水」&「仲有半杯水」嘅諗法差不多。
指數今朝終於見到有一個比較大少少點數嘅開市變幅，升175點，報17,196點，開市只有10分鐘指數就將升幅進一步擴大至逾200點，一度高見17,273點，呢個走勢的確係五分鐘、小時同日線圖上都出現咗觸底走勢，即使今日見牛證仍然都係咁多街貨，可能今日就係技術分析贏嘅一日。
10點打後見指數喺小時圖上暫時力守條中軸，至於五分鐘圖上亦見指數高開低走中，還好作戰室好倉見有戰友今朝率先爬咗格仔，依家等嘅係第二個機會：五分鐘10線守唔守到。
睇文的還是專注於小時圖條中軸，皆因依家10點12分見指數有向下壓過去嘅情況，望返今朝首半小時喺小時圖上出嘅燭，未算是高位但亦都有疑似「陀螺」形態。而保歷加通道口保持收窄仍然有Swing Trade發動條件存在。
坦白講今朝開市都唔易玩，大家目前都只係格仔注，簡單啲用返小時圖嘅中軸作量度線出倉的話，企得住嘅恒指牛(56189)，收回價16,800點，企後少少同現價有約416點距離，槓桿有約5.1倍屬同一收回價中最高槓桿；失線的話就恒指熊(65330)，收回價17,618點，同現價有約400點距離，槓桿約37.4倍，今日新上所以未見有街貨。
五分鐘圖行緊「三角形」，所以出倉份外小心；安全嘅等個「三角形」行完先啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
