【Now財經台】Tesla周二(23日)出咗第2季業績，純利大跌45%，每股經調整盈利亦差過預期，雖然整體收入增長2%，但汽車收入跌7%，繼周二盤後急挫後，周三(24日)開市後一度再瀉12%。近期投資者開始拋售估值高嘅「科技7雄」(Magnificent Seven)，Tesla被沽得咁狠係咪主要同業績有關？
Solomons Group投資及ESG(亞太區)總監黃耀宗指，其實Tesla呢份業績唔係一啲亮點都冇，睇返大數，營業利潤開始升返，而電池儲備及太陽能產業都係集團今年業務重點，所以下季度開始，唔應該只著重汽車業務，可以更多留意能源業務。
佢又話，Tesla基本面及技術層面，中線而言已開始見底，加上市場氣氛唔好，估計Tesla股價未來幾個月都會繼續「浮浮沉沉」。
