【now.com財經】噚日揀咗隻恒指熊(65097)，當指數第一下穿過17,000點嘅時侯就收網走人，呢一趟平均有6.5格或12.87%。
及至3點10分指數再向下失多次17,000點，算是第二個唔過夜走(65097)嘅機會，而第二次失守比第一次失守時，指數擺位仲要再低多少少，(65097)證價最高見過0.063元，應該可以食多幾格。
恒指三連跌，都咪話唔關「鄉下」疑似加息令到啲Yen出現拆倉潮有關。下個星期三(7月31日)BOJ就議息，到時姑且再睇下佢會加幾多、之後想點加、買債規模減幾多、之後又想點再縮先算。都係嗰句：成個世界嘅股市唔係單邊走咁痴線，總會有上上落落嘅時間。
仲有1分鐘先至完U，作戰室一早睇過埋今日嘅街貨圖同Review埋噚日嘅日線/小時圖擺位。今日牛熊證街貨圖仍然見到下方牛證儲住幾層過千張期指街貨，上方熊證則仲瘦過我家肥貓。
走勢圖同街貨圖都睇晒之後，就會發現今日其實係街貨 VS 技術分析嘅日子，準備喺作戰室出開市前策略嘅時侯，坦白講我今日係有偏向出好倉：一來三連跌17,000點失而復得，二來數住之前每日都吞幾千張期街貨，點都應該今個月湊夠數。當然目前見到牛證咁鬼重真係唔可以掉以輕心，所以到最後都係等恒指開咗市之後，mark住嘅一啲量度線位過咗之後，先至開出好倉。
10點未到作戰室第一注好倉已經完成，仲有幾分鐘先至10點，呢啲時間大家都常食完第1Round之後都會等10點打後嘅小時圖擺位擺成點，之後再度第二注出嚟。
睇返恒指暫時最高見過17,229點，爭21點先至可以爬得返上Fibonacci嘅0.5水平，又喺日線圖上見指數噚日踩住「下降通道」底線+保歷加底線後，今日暫時(9點58分止)出咗「身懷六甲」出嚟；當然，今日都仲未過，未知最後仲成唔成形嘅，只係純綷開心有戰友答得到佢係咩形態，姨姨陪感安慰。
10點打後終於見到小時圖踩返上10線樓上水平，只不過指數暫時於1722X點呢個位遇阻，所以喺小時圖上都見到陰燭出現。無事嘅，恒指牛(56189)，收回價16,800點，同現價有約400點距離，槓桿約35.8倍，借得到小時圖10線嘅話，小注出動借Slow STC(14.3)睇下上唔上得返去Fibonacci嘅0.5樓上。
唔得嘅咪恒指熊(65160)，收回價17,636點，同現價有約430點距離，槓桿有約33.7倍。兩邊都揀係因為今日隨時用五分鐘圖出Swing仲有肉食。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
