【Now財經台】美圖公司(01357)發盈喜，估計上半年淨利潤最少增長80%，股價今日(25日)逆市爆升，一度勁升逾11%，高見2.52元，係咪畀到驚喜市場？
艾德金融執行董事陳政深指，美圖呢個盈喜係收貨，以年度業績計，收入持續增長20%至30%，但毛利相對唔算穩定，盈喜冇提及收入增幅，但相信集團正處於增長軌道。
Ryan續指，生成式人工智能(Generative AI)技術影像及設計產品能力提升，帶動用戶付費，對現金流有正面影響。此外，美圖亦有拓展海外市場，面對貿易壁壘時，制裁風險唔大，令市場對美圖業務睇法改觀。
佢又話，市場上有唔少類似產品，作業系統及軟件已內置AI相關嘅美圖功能，呢個模式嘅門檻唔高，容易受對手挑戰，因而影響毛利率。影像及設計產品係公司主業，按應用場景劃分嘅收入中，「生活」佔比較多，收入增長持平，「生產力」就逐步提升，收入大增逾74%，反映應用商業場景收入增加對「護城河」有利。
