【Now財經台】美國副總裁賀錦麗(Kamala Harris)好有機會代替已退選嘅拜登(Joe Biden)，出戰美國總統大選，硬撼特朗普(Donald Trump)。據CNBC分析，特朗普同賀錦麗最明顯分別係貿易主張，特朗普對華一定係「核戰級」強硬，雖然賀錦麗都唔會對華手軟，但估計手法類似拜登，會同中國維持策略性競爭格局，繼續打「科技戰」。到底賀錦麗同特朗普邊個「殺傷力」大啲？
資深經濟師羅家聰認為，兩個人嘅「殺傷力」差唔多，策略上都肯定係針對中國，始終呢個係兩黨共識，分別在於特朗普唔太鍾意同盟友聯手，所以圍堵嘅效果相對小，不過，特朗普又幾親俄，所以美國假想敵對象一定偏向中國。
KC又話，貿易戰方面，特朗普任內門面工夫做得好足，但實際上係虛張聲勢，到後期連關稅都撤埋，反觀拜登冇乜門面工夫，但實際上通過咗唔少殺傷力唔細嘅法案，雖然兩黨手法唔同，但效果唔會相差太遠，目的都係圍堵中國。
