【now.com財經】噚日喺作戰室都唔係無做到嘢,中段休息時有戰友問恒指下一個量度位會去到邊。手痕用上指數今年內嘅高(5月20日19,706點)低(1月22日14,794點)位拉個Fibonacci出嚟,咁啱得咁橋,0.5個位就係17,250點,同噚日嘅低位17,251點只係爭一點咁大把。所以下半場淡倉喺作戰室再開出之後,結果3點未到就落到17,250點前,全員收工!
![](https://d2egz9lcgl7v72.cloudfront.net/CMS_images/NewsImage/2024-07-25-10-26-091dqs2RZR.png)
今朝起身睇電視就堅囉,隔晚美股跌500點,再到日經跌過千點。已經一早呼籲作戰室全員嘅日股做好防風措拖。
至於港股方面,今朝低開50點都估到會再向下落,爭在向下行嘅速度係點,事關指數仍然企近牛證街貨嘅同時,噚日涀剩得返50點生命值嘅17,200至17,299點呢層,居然今日返嚟再儲到上過千七張期指街貨,雖則下個星期二先至期結,但呢口肥豬肉同有人夾到埋咀邊,爭在你擘大個口「呀~」咁樣喬落去啫。
10點未到17,200至17,299點呢層重貨牛當然無咗,作戰室第一注淡倉都已經完成,Fibonacci嘅0.5今日如果唔出下影線爬返上去嘅話,怕且都真係係咁先啦。
小時圖上見保歷加通道口目前仍然拓闊中,Slow STC(14.3)兩線仍然處於超賣範圍,換言之Slow STC(14.3)係仲有條件出到超賣再超賣,咁指數就再有下行空間。
的確係好有貪念地恒指熊(65097),收回價17,548點,同現價有約400點距離,以槓桿約36.5倍向下再掃埋餘下兩層重貨牛。
個個都話17,000點見,又姑且睇喺下個星期二之前到唔到囉。
作者阿珊,以技術分析專心玩輪證,唔貪心,努力賺取我家肥貓罐罐。
Patreon作戰教室七日免費體驗:https://www.patreon.com/join/cbbcwar