【Now財經台】羅素2000指數成分股第2季盈利估計增長約18%，扭轉連跌5季嘅劣勢，上周除咗「Trump Trade」外，仲出現Great Rotation，資金開始轉炒其他板塊，不再瞓身人工智能(AI)相關股份，之前跑輸嘅羅素2000指數係咪會繼續成為市場焦點？市場會唔會繼續吼細價股？
獨立市場策略師陳俊文指，依家正值美股業績期，巨企業績非常亮眼，羅素2000指數長期落後，一旦聯儲局減息係基於通脹考慮，而經濟又冇問題，中小型企業會比較受惠，呢類公司負債比率較高，亦對息口敏感，所以有機會受惠於息口向下。雖然資金輪動持續，但唔會長期利淡科技股，因為AI勢頭仍然強勁，大型科技股會繼續受惠，佢又估計，資金輪動可能幾星期內結束，一旦美國減息，將會對中小型股有一定幫助。
投資部署方面，Norman建議投資者揀大型企業會比較穩陣，若相信AI中長期可持續增長，大型科技股吸引力仍然好大。
