【Now財經台】美國聯儲局減息預期降溫,加上中國6月黃金進口大減,國際金價昨晚(22日)失守每盎司2400美元,今日(23日)亞洲交易時段一度上返去,但之後再失守,仲輕微跌穿上升通道,美國總統大選嘅選情,隨著總統拜登(Joe Biden)放棄競逐連任出現變數,係咪要等大選民調及數據出爐,金價先有機會再衝高?
信誠證券及期貨投資服務部董事蕭猷華指,金價上一個歷史高位係2449美元,上星期已升穿咗,近期最高見過2483美元,每次破咗前歷史高位都會回調,但仍然係一浪高於一浪嘅格局,所以金價大牛市仍然持續。
佢又話,睇返金價技術走勢,2380美元水平有頗大支持,今日(23日)係逼近過2390美元,最新又上返2397美元,佢認為現水平可以考慮吸納,短線有力升至2500美元,中線更有機會見2620美元。