【Now財經台】英皇國際(00163)股價今朝(22日)高開1%後，升幅一度擴大至23%，高見0.425元，其後升勢回順。睇返技術走勢，股價今日衝高後，好快要退守100天線，暫時仲未走出橫行區。
集團公布，以逾11億元出售一籃子物業，包括15個位於銅鑼灣、尖沙咀及屯門等區嘅商業單位、零售舖位及住宅單位等。通告又指，今次出售所得90%會用於擴充營運資金、擴展現有物業發展。不過，集團預期，今次交易沒有盈虧，買家係大股東楊受成私人持有公司，即「左手交右手」，純粹套現打個和。
通告又提及，集團將於下周三(31日)將召開董事會，以考慮及批准宣派特別息。近年公司頻繁出售資產畀同系或大股東，但上次因為類似交易而派特別息已經係2021年，當年每股只派1仙。
英皇股價今日炒起，似乎係小股東對特別息有憧憬，相信持股75%嘅大股東楊生同樣想袋袋平安，留意下周董事會有冇好消息。
