【Now財經台】停牌逾1年嘅CLSA PREMIUM(06877)今朝(19日)復牌，股價裂口高開40%，其後升幅一度擴大至84%，高見0.129元，成交金額約250萬元。
CLSA PREMIUM前身為昆侖國際金融，主要在華人聚居嘅海外城市提供金融服務、產品，2015年中信証券(06030)入主後，股價曾炒到2元以上，但2019年5月收到澳洲證券及投資委員會通函，指公司嘅內地客戶業務可能違法，7月開始管理層陸續跳船，幾乎全部換人，對業績影響好大，其中，同年收入大跌96%。
CLSA PREMIUM訴訟不絕，不斷停牌又復牌，控股股東中信証券表明有意轉讓28%至40%股權，雖然唔係全部賣晒，但退出意味好濃，CLSA PREMIUM不論業務或股東面目全非，點樣估值可能要重新評估，亦要留意接貨對象係咪對公司新業務有利。
