【Now財經台】市傳美國總統拜登(Joe Biden) 被要求退選,依家市場消息滿天飛,美國總統大選會唔會令金融市場持續出現震盪? 此外,內地近期出爐嘅經濟數據欠佳,係咪會持續困擾港股?
博威環球證券金融首席分析師聶振邦指,跟拜登關係友好嘅前眾議院議長佩洛西(Nancy Pelosi),以及前總統奧巴馬(Barack Obama)都勸退拜登,因此,市場認為佢好大機會退選,極有可能由民望較高嘅副總統賀錦麗(Kamala Harris)出戰,佢又認為民主黨形勢未必係一面倒。聶Sir提醒,環球股市未來一至兩周走勢,有機會受環球貿易及地緣政治影響,所以唔好單睇美國大選。
內地經濟方面,聶Sir指出,早前公布嘅經濟增長及「三頭馬車」數據都偏弱,令市場對內地經濟情況憂慮升溫,另一方面,若歐美等國家針對中國晶片嘅限制不斷「加辣」,一定對內地科技發展造成阻礙,加上人仔今個星期仍然弱勢,人民幣走弱,都不利港股表現。