【Now財經台】美國總統拜登(Joe Biden)喺2022年簽署晶片法案,法案生效以來,反映美國半導體股走勢嘅費城半導體指數累升1倍,去年底掀起人工智能(AI)熱潮後,令晶片股升勢火上加油,不過,若特朗普(Donald Trump)成功再度入主白宮,以佢一貫對晶片及AI嘅政策,對呢類股份嘅前景有咩影響?
易方資本助理基金經理王逸研指,現時拜登政府對華出口AI晶片嘅政策愈來愈辣,佢估計,下任總統將會延續拜登嘅政策,甚至進一步收緊。
佢又話,特朗普偏向打擊大型科技企業,佢任內同大型科企關係一般,推行新計劃時會有阻滯,間接令AI超大規模算力擴產有延期風險,但總括嚟講,特朗普主要以外部為目標,對美國企業都係以「出口術」為主,相信對晶片股影響有限。