【Now財經台】港股連跌兩日,累跌逾560點,上周升幅已全部化灰,跌市原因包括市場擔心特朗普一旦再當選,將會再收緊對華貿易限制,其次係內地宏觀數據唔理想,以及憂慮三中全會最終冇驚喜。恒生指數昨日(16日)再失18000關,10天及20天線都守唔住,後市係咪唔太樂觀?
潤淼資產管理董事盧志威認為,一旦特朗普成功再入主白宮係不利港股,睇返佢上次當選美國總統,中美爆發貿易戰,對華關稅係非常高,首先係中美會唔會再爆貿易戰,其次係內地已推出唔少政策,包括放寬內房、互聯網遊戲政策,但關鍵係呢啲資金會唔會釋放出嚟,佢又話,一旦再爆貿易戰,但美國大手減息,就有條件放寬貨幣政策,如果出現呢個情況就會利好股市。
不過,William提醒,都要視乎出現呢啲情況嘅時機,到底係係咪過咗三中全會,等特朗普上任後,以及聯儲局亦已減息。佢估計,若美國9月開始減息,下半年嘅銀根會較鬆動,繼而帶動股市向上。