【Now財經台】美國總統候選人特朗普(Donald Trump)近期消息不斷,投資市場開始炒起各種「侵侵」概念,例如特朗普轉軚撐加密貨幣,上周末佢出席競選集會時遭槍擊後,比特幣(Bitcoin)價格一口氣升穿6萬美元,但明明6月底佢同現任總統拜登(Joe Biden)首場電視辯論後,Bitcoin曾跌穿5.5萬美元。
資深經濟師羅家聰認為,市場將一向大上大落嘅Bitcoin同特朗普掛鈎係純屬炒作,並指Bitcoin係少數周末仲有得交易嘅資產,所以資金就入市玩兩鋪。
KC又指,Bitcoin呢一輪爆升後仍未突破5萬至7萬美元區間,而基本面來看,美國開始收緊加密貨幣監管,加上減半事件(halving)亦發生一段時間,暫時未有真正利好消息,料短期仍要繼續區間上落格局。