【Now財經台】小米集團(01810)今朝(16日)在微博宣布將於周五(19日)晚上7時舉行新品發布會,摺疊旗艦手機「小米MIX FOLD 4」將會亮相,董事長雷軍形容呢部係「真正頂配全能摺機」。過往雷軍一般會喺8月發表年度演講,今年提早喺周五傍晚,係咪為「小米MIX FOLD 4」造勢?之前小米推出電動車時,股價就大幅炒上,今次會唔會借「小米MIX FOLD 4」炒返轉?
華盛證券財富管理部董事李偉傑指,小米一向好識把握發布新產品時機,估計小米股價今次都會借發布新手機炒高,加上呢部新摺機有人工智能(AI)加持,而售價會貴過上一代「小米MIX FOLD 3」,對小米毛利都有幫助。
Jason又話,有過汽車發布會嘅成功例子,相信今次發布「小米MIX FOLD 4」都會為小米股價帶來驚喜作用,集團有可能一次過發布市場關注嘅消息,例如手機及汽車業務。