【Now財經台】市場昨日(15日)仍擔心金價企唔穩每盎司2400美元，但昨晚再衝高，更逼近2440美元，美國聯儲局主席鮑威爾(Jerome Powell)「放鴿」，話唔需要等到通脹回落至2%才減息，加上炒作「Trump Trade」效應，金價係咪隨時會再破頂？
信誠證券及期貨投資服務部董事蕭猷華認為，金價正醞釀破頂，前頂係2449美元水平，其實金價喺4月及5月曾見2430美元水平，甚至2449美元，依家出現一個3頂情況，底部就分別喺5月初及6月中，大約喺2280美元水平，依家黃金基本因素係十分利好，包括減息周期、避險及央行購買黃金等，如果後市可以升穿2450美元，目標可以2620美元。
