【Now財經台】一單槍擊事件令特朗普(Donald Trump)喺今次美國總統大選嘅勝算急升,更帶挈特朗普概念股集體暴漲,其中,特朗普媒體科技集團(Trump Media & Technology Group)(DJT)昨晚(15日)盤前一度飆逾60%,其後升幅收窄,公開支持特朗普嘅馬斯克(Elon Musk)旗下Tesla股價亦有得升。早前,特朗普指,若他再當選,會將包括Meta創辦人朱克伯格(Mark Zuckerberg)在內嘅「選舉舞弊者」送入監獄,Meta股價盤前好淡爭持。短線而言,投資者可唔可以趁呢段時間追入特朗普受惠股?
iFast Global Markets副總裁溫鋼城指,特朗普概念股唔適合長揸,例如DJT,因為股價太Chok。至於Meta,溫鋼城指,特朗普話佢當選會送朱克伯格入監獄,呢啲言論可能都只係「講吓」。
如果想投資美股,佢認為可以考慮澳洲電訊(Telstra),因為食到人工智能(AI)熱潮呢條水,不過,現價偏貴,不妨等股價由260美元回落到介乎200美元至230美元再買入。