【Now財經台】細價汽車服務股冠轈控股(01872)喺3個月內進行多次股本融資，4月中「10合1」後，6月初就以每股0.63元配股集資1124萬元。上周五(12日)集團又出通告，建議以每股0.4元「1供4」，較上周五收市價折讓20%，料今次集資淨額有1.7億元，稱主要用來拓展泰國電動車業務。
冠轈今日(15日)低開後好快倒升，一度飆升24%至0.62元，不過升幅其後收窄，收報0.57元。
《香港股票財技密碼》作者梁杰文認為，1供4比例誇張，意味現有股東需要攞多4倍錢來供股，先可以避免股權被攤薄。Mike續指，冠轈供股集資嘅規模遠大過市值，而集圖每股資產淨值(NAV)截至去年底值近4元，供股價較大幅折讓近90%。
佢估計，最極端情況係如果所有公眾股東都唔供股，到時承配人持股會升至80%，公眾股東就被攤薄至9.99%，變相易主。不過，佢唔排除大股東會搵友好人士參與承配，乘機執平貨，大幅增持股份。
