【Now財經台】截至早上11時止，1小時內《彭博》搜尋量最多首5隻港股，依次為龍湖集團(00960)、中國銀行(03988)、瑞安房地產(00272)、中國金茂(00817)、長城汽車(02333)。
內地上周五(12日)公布新增人民幣貸款、社融規模增量、貨幣供應等數據都差過預期，反映信貸需求疲弱。高盛直言擔心情況持續，對內銀第2季淨利息收入及息差都有影響。內銀H股今日(15日)成板跟隨大市向下，包括喺搜尋榜排第2嘅中行，集團上周一(8日)除淨後，仍未補回下跌裂口，股價由3.8元水平直插逾7%，今日更一度險守3.5元。市場睇淡內銀業績，靠估值平及高股息仲撐唔撐得起股價？
富昌證券聯席董事譚朗蔚指，內房資金鏈問題餘波未了，加上經濟數據唔理想，人民銀行更大機會減息降準，令內銀息差持續收窄，呢啲基本因素都不利內銀股向上。
不過，Stevan認為，踏入下半年，港股投資者仍未願意追逐風險(risk-on)，預期市場會追捧內銀股、資源股等「中特估」概念股，而內銀股走勢相對資源股穩定，適合用嚟長線收息，佢又話，首選中行、工商銀行(01398)及建設銀行(00939)，其中，中行除淨後股價未見回升，建議喺3.3元至3.5元分段吸納。
