【Now財經台】國家統計局今朝(15日)公布多項重磅經濟數據,其中,第2季國內生產總值(GDP)按年增長4.7%,低過市場預期嘅5.1%,零售銷售按年增長2%,低過市場預期,固定資產投資及工業增加值就預期差唔多。至於上半年房地產投資按年跌10.1%,差過預期。雖然6月冇乜假期,但零售銷售仍持續放緩,係咪反映消費力始終谷唔起?還是受季節性因素影響?
中信銀行(國際)首席經濟師卓亮指,內地上半年GDP增長5%,同全年目標升幅差唔多,不過,零售銷售增幅仍處於長期低位,反映消費動力係各項宏觀經濟指標中,壓力最大嘅一環,需要更多時間才可復甦。
佢又話,要提升消費動力,重點在於改善社會生產,增加居民收入,雖然未知今日開幕嘅三中全會有咩新政策,但就目前而言,下半年嘅改善程度唔係太理想。