【now.com財經】今朝起身時本來見到出面都仲係晴空萬里，但轉個頭忽然黑晒仲落出大雨，戰友話天文台一早講咗呢幾日有可能打風，隨時有幾個風打到嚟，大家出門帶定遮之餘，隨時要帶定多對襪呀！
睇返條恒指，由今年1月22日低位14,794點，上到5月20日高位19,706點，累升4,912點之後之後向下碌到7月9日低位17,376點，反方向累跌2,330點，接近之前累計升幅嘅一半後，喺100線+250線+下降通道底+保歷加底四歸一支持下，暫時算叫停。
正當日股跌500、600點，噚晚美股又受科技股拖累之下，終於今日恒指出人頭地，指數開市升187點，終於「還我18,000！」，開市見18,020點。到依家開市只係13分鐘，指數高位見過18,139點，指數已經將首三層熊證街貨全數收回，呢度夾埋有相當於981張期指。
同作戰室戰友交代風箏策略玩法之後，10點未到指數已經上埋去18,200點樓上，再食多684張期指，總數1,665張期指已經變成早餐。下一步再睇嘅係指數企得穩喺18,200點呢個位之上，皆因唔覺唔覺，指數踩咗入熊證重貨區。
等到依家10點11分，小時圖上見高見出現18,226/18,222點，爭四點確認唔可以叫做「平頂」，但是 依家有見升幅收窄至升342，報18,174點，即回返落去18,200點樓下。於小時圖上借出7月4日高位18,133點拉出量度線的，就大約可以框住指數嘅範圍。
另一方面，再睇返五分鐘圖上見，都係同個「平頂」位置，指數依家稍為回落靠近10線，作戰室一早好倉食咗一輪架啦，亦都貼咗堂見今日MVP，蓋目前指數仍然踩住熊證街貨同時又同牛證咁遠，借五分鐘圖10線企好嘅話，恒指牛(63746)，收回價17,588點，同現價有約600點距離，槓桿有約24.6倍，算是近牛之中高槓桿得嚟又少街貨架啦。
坦白講條Slow STC(14.3)不論喺五分鐘還是小時圖都搶到咁高，呢啲位出好倉再追係有難度嘅，所以，真係見過線出到倉先至好出。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
