【Now財經台】內地上月通脹低過預期，市場擔心通縮威脅仍然存在，港股及A股持續受壓，其中，恒生指數已連跌4個交易日，累跌逾500點，失守250天牛熊線。中證監昨晚突然宣布，今日(11日)開始暫停轉融券業務，同埋收緊沽空。三中全會下周就會開幕，即使有政策憧憬，但資金似乎仍冇乜炒作意欲。
東亞銀行財富管理部首席投資策略師李振豪指，過往市場炒作三中全會主要炒政策轉變，都會令大市喺會後有一浸沖喜作用，但要留意都係比較短暫，因為講咗大方向之後，點樣執行先至係最重要，依家市場預期嘅經濟或財金政策，都係偏向保底、頂住唔好跌，而唔係推高，所以都令市場比較審慎，所以不論港股及A股都觀望緊會議有咩訊息，再加注受惠板塊係好正常。
