【Now財經台】恒生指數今日(9日)早段大市失守250天牛熊線，即17509點水平，低見17376點，不過，手機設備股逆市造好，表現強勢，到底受咩因素帶動？丘鈦科技(01478)6月手機攝像模組出貨量按年升近35%，但按月跌幅擴大，表現係咪比同業差？
信達國際研究部董事趙晞文認為，手機設備股今日逆市升有大原因，首先係全球智能手機市場復甦，其次係人工智能(AI)手機滲透率上升，最後係主要客戶備貨量上升，令市場焦點及資金落喺呢個板塊。
佢又指，丘鈦月度數據參考價值唔大，因為6月唔係傳統旺季，因此，每月手機出貨量短期會較為波動。丘鈦上半年手機攝像模組出貨量已超出公司指引逾一半，所以嚟緊嘅中期業績，丘鈦有機會調高全年手機攝像模組出貨量指引。
