【Now財經台】粵豐環保(01381)獲喺A股上市嘅瀚藍環境提出私有化，股價今朝(8日)高開近6%後，升幅不斷擴大，一度高見4.43元，升9.1%，成交股數較過去100日平均大增約50倍。
集團昨晚(7日)發通告，指獲瀚藍提私有化，建議作價暫定4.9元，較上周五(5日)收市價有逾20%溢價，交易完成後，公司會退市。受消息帶動，瀚藍A股今日都造好，衝上兩年半高位，單睇兩家公司股價反應，呢單交易似乎係雙贏。
睇返技術走勢，雖然粵豐近期成交多咗，但股價仍然冇乜突破，私有價4.9元係近1年高位，較今朝高位4.43元仲有約10%水位，後市要留意呢單交易有咩進展。
