【Now財經台】港股繼續上落格局，不過，個別覆銅板產業鏈股份近日開始異動，其中，建滔積層板(01888)股價借外圍行業消息炒作，今日(4日)早段最多升逾6%，高見8.73港元。
原來有南韓高端覆銅板及銅箔供應商日前獲英偉達(Nvidia)確認產量，是次供應嘅HVLP銅箔可用於人工智能(AI)加速器，簡單而言，即發展AI會增加對高端銅箔嘅需求。建滔3月中嘅去年業績亦提及，旗下高端覆銅板相關產品剛完成開發，正跟客戶進行全面測試，意味有機會於未來數年量產。
博威環球證券金融首席分析師聶振邦表示，台灣中低階覆銅板生產商因AI伺服器急速發展，導致產能緊張而開始加價。佢相信，未來2至3年覆銅板嘅行業前景樂觀，而建滔覆銅板業務去年貢獻集團98%收入，達160億元人仔，料將受惠環球再漲價趨勢。
股價方面，聶Sir認為，若建滔後市企穩10港元以上，未來1年目標價可以睇14港元，即2020年6月嘅高位。
