【Now財經台】李寧(02331)今日(4日)收市跌近4%，收報15.7元。
據外電昨日(3日)報道，創辦人兼大股東李寧考慮增持公司股權，又唔排除引入私募基金，刺激股價最多升近3%，高見16.52元，但升勢今日已無以為繼，股價再喺近期低位掙扎。
雖然李寧嘅估值已經調整咗唔少，但大行富瑞指，內地體育用品行業正面臨下調全年零售指引嘅風險，主要受累消費降級、產品欠缺創新、奧運宣傳及氣氛唔算熱烈，有數據顯示上月需求較5月進一步減弱。富瑞更點名李寧，為保毛利率拒絕大幅減價，因此，6月嘅銷售壓力比同業更沉重。
李寧股價去年累跌68%，成為去年表現最差藍籌，年初至今暫時仍要再跌約20%，而今年初曾見14.94元嘅逾4年低位。此外，公司去年底話要做30億元回購又虎頭蛇尾，最終回購規模不足8億元，如果後市冇重大利好消息，股價或要再試低位，甚至破底。
