【Now財經台】英國今日(4日)舉行大選，改朝換代已成定局，預期在野工黨將會大勝，睇返大選前債市、股市及英鎊走勢，似乎對工黨上場反應幾正面，工黨上場係咪可以提振當地經濟仍要觀察，但有分析指，有機會掃除多年來嘅政治及經濟不確定性，有利外資流入，英鎊短線有冇力再上？
東亞銀行財富管理部高級投資策略師黃燕娥指，若工黨勝選，市場睇法會較正面，選民支持工黨係買個希望，而工黨競選口號係「創造財富」，正正講出當地人嘅心聲，並相信工黨政策會較為親歐。
佢又話，見到英鎊及英國相關資產喺大選前夕偷步造好，前者已重上1.27水平，但提醒一旦大選結果一如預期，投資者有機會獲利，而英鎊短期阻力睇1.283水平。
