【Now財經台】英國、法國近日迎來重要選舉，市場關注兩國政局隨時「變天」。英國今日(4日)召開國會大選，被視為執政14年嘅保守黨及首相辛偉誠(Rishi Sunak)嘅「政治豪賭」。周日(7日)輪到法國嘅國民議會選舉次輪投票，極右翼政黨國民聯盟(Rassemblement National)喺首輪投票暫時領先。
資深經濟師羅家聰認為，即使由在野黨勝出並掌政，相信佢地喺上任初期唔會大刀闊斧改革或推行新政，唔擔心英法兩國以致歐洲嘅整體經濟會受到衝擊。
KC續指，英國工黨嘅支持度壓倒性領先，毫無懸念地將會勝選，並估計工黨會汲取保守黨嘅教訓，1年半載內唔會貿然加稅，避免好似當年卓慧思(Liz Truss)操之過急而匆匆下台。
法國方面，KC就話，國民聯盟黨魁瑪麗勒龐(Marine le Pen)喺上屆大選明知會落敗，先會譁眾取寵地大講「脫歐」，而今次嘅路線同政綱明顯回歸理性，相信上台初期後會專注民生議題。
