【Now財經台】美國將會喺11月舉行總統大選,由於爭取連任嘅拜登(Joe Biden)喺首場電視辯論中表現好差,有好大聲音要求佢退選,能唔能夠順利代表民主黨出選有幾大變數,點睇事態發展? 近期金融市場似乎炒緊特朗普(Donald Trump)再上台,唔少相關股份被炒起,唔少分析認為,一旦佢再入主白宮會有利股市,係咪真係咁?
思博資本高級合夥人張宗永指,如果睇返拜登過去4年嘅政績,其實做得唔錯,外交方面可以團結到盟友,內政方面就透過好多行政命令去推動佢嘅政策,間唔中叫錯人名、行路唔係好穩,其實冇乜大不了。佢又話,如果拜登退選,最順理成章就係賀錦麗(Kamala Harris)代替,但美國人對佢係有保留。
張宗永又話,市場的確已做緊Plan B,一旦特朗普再上台情況會點,佢認為,兩人嘅勝選差距其實未必係咁大,而兩人嘅財政方針亦唔係有太大分別,反而最重要係唔希望一黨獨大。
對華政策方面,佢認為拜登係「綿裡針」,反華意識強過特朗普,又識玩外交,所以對中國嘅傷害可能更大。