【Now財經台】世界人工智能大會(WAIC 2024)將於明日(4日)至周六(6日)舉行，市傳商湯(00020)將於大會上發布新版大模型「日日新5.5」，刺激股價今日(3日)抽升17%，衝上近兩個月高位，最新成交已逾30億元，點睇發布大模型對股價嘅刺激作用？商湯股價可唔可以衝得更高？
元宇證券基金投資總監林嘉麒指，商湯曾提及「日日新5.5」對比OpenAI 4.0 Turbo版本，運算能力更高，市場開始了解「日日新5.5」版本點解咁快推出，估計係出現技術突破，甚至邏輯運算能力可能全球最快，若新版本做得好，股價一定有上升動力。
商湯就快出半年業績，根據過往經驗，公布半年業績後股價都會有一輪炒作，KK估計，商湯今年上半年業績將較去年同期明顯改善，不過，佢唔建議呢段時間高追，因為股價有機會雙頂回落再抽升，長線有能力破頂，短線亦值博，但回調空間比上升空間大，唔可以期望個頂一直升穿，除非消息面非常強勁，做短線部署亦水位有限。
