【Now財經台】截至早上10時45分止，1小時內《彭博》搜尋量最多港股，依次為中金公司(03908)、建設銀行(00939)、碧桂園(02007)、萬科企業(02202)及中國海外發展(00688)。
內地劵商龍頭中金嘅前景，無可避免都要睇住A股，但內地股市近期氣氛麻麻，上證綜合指數續受制於3000點關口，內地新股市場上半年都幾淡靜，只有44隻新股上市，集資額僅約320億人仔，遠低於去年同期，似乎中金今年盤數都唔會好？
資深證券分析師彭偉新指，A股弱勢一定對內地劵商造成負面影響，依家市場憧憬三中全會有改革政策出台，加快內地劵商透過聯動機制，加大海外業務運作，成為劵商股短期利好因素，但呢個只係短期炒作，最終有冇政策出台仍然係未知數。
Castor又話，中金股價近日跌至保歷加通道底部，技術上有機會出現反彈，但反彈幅度未必足以收復呢浸失地。
