【Now財經台】國銀金租(01606)股價今朝(3日)一度升逾10%，高見1.48元，其後升幅收窄，成交股數較過去100日同時段平均增8倍。
國銀昨日(2日)開市前停牌，主要係剛過去嘅周日(6月30日)有報道指，控股股東國家開發銀行正磋商出售國銀大部分股權，潛在買家係深圳一家國企，公司噚日收市後出公告澄清，指國開行一直有研究公司業務，包括曾考慮轉讓股權，但暫時未有任何承諾或協議，但冇否認傳聞，刺激股價今日復牌炒上。
睇返技術走勢，國銀2016年以2元上市，直至去年底先開始有返啲成交，今年初突然炒高，仲上返水面，但收購消息一出，又從2元樓上掟返落起點，雖然相對強弱指數(RSI)已跌到極超賣水平，但今日都係彈唔起，與其憧憬潛在交易，不如離場。
