【now.com財經】依家9點8分，趁恒指行緊U盤時，睇住美洲國家盃先。而凌晨時段嘅歐洲國家盃八強出爐，因情意結而買英格蘭冠軍，同我家老爺未開波賽前貼定嘅葡萄牙冠軍都順利出線，不過踼到依家發覺西班牙今屆個勢好強，可惜呀...可惜個賠率呀...
恒指完U時還好戰友叫返我返嚟呢個戰場，指數先開升72點，報17,841點，呢口價其實剛好踩住喺牛熊街貨中間位，望下個牛熊證街貨圖見下方牛證又再儲返起啲肥牛返嚟；而上方熊證第一層18,000至18,099點重貨區都只係得相當於700幾張期指街貨。按街貨計嘅話，指數向下落去殺牛證街貨亦非常合理。
不過，睇埋五分鐘圖至日線圖，見Slow STC(14.3)都係有出觸底格局，論技術分析的話，咁指數又會似向上行。咁即係又到咗街貨 VS 技術分析嘅局面啦？雖然有八成機率係街貨贏，但有時侯技術分析都會跑出架。
到正式開市之後，指數先升後回再升過，聽到呢個走勢都覺得Chok，所以作戰室今日都未能全面勝仗；還好嘅，大家都明白落場嘅又點會日日贏；日日贏就唔駛返工啦！只要止蝕同帽一樣擯得快就得啦。
再睇小時圖，今朝一早已經畫到「平頂三角形」出嚟，下方10/20線暫時都仲借到，見Slow STC(14.3)兩線呈上就姑且睇住佢有機會向上突破先；但換一換個保歷加通道出嚟見指數喺10點28分再浮返上去17,900點樓上之後，同步指數亦掂到保歷加通道頂線，而通道口都仲未拓闊。
連小時圖都出現街貨 VS 技術分析嘅局面，咁睇嚟都係等稍後時間指數借唔借小時圖條中軸企住先啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
