【Now財經台】中石化冠德(00934)股價今日(2日)升至9年高位，一度高見4.3元，升6.2%，收市報4.24元，升逾4%。
現時集團預測市盈率(PE)僅約7倍，最大優勢係現金多，截至去年底止，手頭現金逾58億元兼冇負債，去年單係造定存已收息逾2億元，公司絕對有能力增加派息，股價今日成功突破近3、4個月橫行阻力，即4元水平，而且有成交配合。
睇返月線圖，再上望阻力就喺5元整數關口，睇埋純利表現，公司去年賺近13億元，其實已超越2014年期間幾年，但估值及股價仲未收復到，主要係中資股投資氣氛同以往已截然不同。
