【Now財經台】美國總統大選上周舉行首場電視辯論，現任總統拜登(Joe Biden)被形容為慘敗，對手特朗普(Donald Trump)表現佔盡上風，更刺激美股期貨升幅顯著擴大，有評論形容，一旦特朗普當選，美股基調將有改善，因為佢唔會容忍股市向下，而股市表現係佢嘅工作表現指標之一，但對於喺內地有業務嘅企業，可能係一個壞消息，若特朗普再度入主白宮，美股會點走？
資深經濟師羅家聰指，特朗普一旦當選，可能會重施故技，即大減企業稅，的確會有利股市表現，但考慮到財赤問題，仍要睇下有冇減稅空間。
KC又認為，特朗普會繼續針對內地企業，因為呢個已經係國策，無論邊個上台策略上都唔會有太大改變。
佢續指，如果真係減稅，對交易較頻密、稅收較重嘅企業會更有利，現時美股由人工智能(AI)熱潮主導，相信AI相關股喺特朗普上任後可以繼續受惠。
