【Now財經台】恒生指數上半年累升3.9%，表現好過A股，但相比亞太區股市及美股納指、標指，升幅相對落後，港股下半年會受咩因素影響？邊啲板塊值得留意？
中泰國際策略分析師顏招駿指，上半年主要有兩大因素困擾港股，包括內地經濟復甦疲弱，以及美國聯儲局減息時間一直唔明朗，展望下半年，要留意內房銷售狀況，期望三中全會後嘅7月政治局會議，會對下半年有冇最新財政政策定調。此外，要關注美國聯儲局9月會唔會開始減息，因為美國減息有助紓緩港股部分流動性擠壓問題，利好港股下半年表現。
板塊方面，Alvin建議投資者可留意內銀、電訊、能源等高息股，因為「國家隊」身體力行支持高息板塊。此外，加碼回購或分紅嘅科技股、互聯網平台亦值得關注，因為呢啲股份估值偏低，又不斷上調盈利預測。
佢又指，受惠於海外經濟復甦，銅礦、有色金屬等資源股喺上半年係贏家，預期下半年升勢持續，而可受惠於政策支持嘅工程機械股亦可以留意。
