【Now財經台】今日係港股上半年最後一個交易日，期內，恒生指數累升逾600點或近4%，雖然港股走勢好過A股，但踏入6月，恒指大部分時間都缺乏方向，係18000點水平唔上唔落，近日更明顯下滑，展望下半年，投資者開局時應該點部署？會唔會繼續由政策主導？
安柏環球金融首席投資總監雷志海指，港股喺4月至5月大幅反彈，但主要受外國機構投資者重整投資組合帶動。過去1年，可能投資者過度減持港股及A股，導致股市出現回調，但相信呢啲係一次性動作，現時可能係持觀望態度，所以未必持續有資金流入港股。
John續指，相比政策效應，基本面係咪可以持續向好更重要，事實上，內地去年至今，不論針對經濟、投資及樓市等，已推出唔少相關支持政策，但成效似乎唔大，予人「一手放一手緊」嘅感覺，仍未開足火力。
