【Now財經台】有「港版淡馬錫」之稱嘅香港投資管理有限公司(港投公司，HKIC），管理港府旗下4個基金，包括「香港增長組合」、「大灣區投資基金」、「策略性創科基金」及「共同投資基金」，創始規模達620億元。近期先後宣布跟港產「獨角獸」科企思謀集團(SmartMore)及生命科學人工智能(AI)大模型公司百圖生科（BioMap）簽訂戰略合作協議，點睇港投公司及佢嘅前景？
資深銀行家黃遠輝指，港投公司其實唔應該被視為「港版淡馬錫」，雖然投資理念相同，但規模差距較大，港投公司只係將過去唔同時期建立嘅基金歸一，形成一個香港增長組合或大灣區投資基金。
佢又話，好多主權基金都會爭取長期回報，政府希望更多創科企業落戶香港，推動創科之餘，讓經濟受惠於引資及基金投資，不過，要達至呢個目標絕對唔易，因為引入本身已有高回報嘅企業好難，能夠引入嘅始創公司或經營有困難嘅企業，又要配合到自身發展先會考慮落戶，所以一方面希望追求長遠回報，另一方面又要引入合適企業刺激經濟，對基金經理及港投公司嚟講都係考驗。
