【Now財經台】天齊鋰業(09696)股價今日(26日)臨近中午一度大升逾16%，其後跌幅顯著收窄，僅錄單位數升幅。上游鋰輝石價格今年已累跌16%，但近期跌勢似乎開始放緩，單計6月，暫時僅跌逾1%，不過，中下游化合物價格跌勢開始變急，對天齊嚟講是好是壞？
元宇證券基金投資總監林嘉麒認為，隨著鋰輝石價格跌勢放緩，未來有望企穏，甚至反彈，同供求問題好轉吻合。不過，去年都發生過類似情況，大行曾指出，新能源汽車對這類產品需求增加，估計價格將會回穩反彈，但最終仍繼續尋底，所以依家判斷產品價格見底屬言之尚早。
KK又指，2021年開始，當鋰價高企時，已有唔少產能投入市場，相關周期約3年，因此，所以要睇全年情況先知行業供求有冇實現平衡。
股價方面，林嘉麒就話，大行唱好之餘，市場又活躍返少少，短期來講會對天齊股價有幫助，短炒有一定值博率，不過，鋰業利潤始終能見度太低，產能過剩問題仍然存在，所以現階段唔建議做中長線部署。
