【Now財經台】中國旺旺(00151)今日(25日)中午出咗業績，全年多賺逾18%，若拆開上下半年睇，下半年純利增長較上半年勁，管理層喺業績報告中指出，部分原材料及包裝材料價格回落，令去年度銷貨成本按年減少2%，推高咗毛利率，加上控制開支及所得稅率下調，都帶動盈利增長。旺旺去年下半年業績似乎做得唔錯。
華盛證券財富管理部董事李偉傑指，旺旺成本下降係盈利增長嘅關鍵因素之一，營業額佔比較大係乳製品，主要原材料進口全脂奶每單位成本錄得單位數跌幅，令集團盈利表現突出。
Jason續指旺旺業績另一個亮點係海外業務，集團越南工廠正式投入運作，不單生產成本比內地平，更有助推廣東南亞市場，加上旺旺喺包括越南在內5個國家有附屬公司，因此，海外市場亦成為業績增長嘅關鍵。
