【Now財經台】英偉達(Nvidia)股價已連跌3個交易日，累跌13%，市值累計蒸發約4300億美元，更拖低標指及納指向下，Nvidia短期係咪已經見頂？此外，美股近期升勢唔全面嘅情況持續，係咪要開始睇淡美股？
資深投資者莫家強指，唔需要因為Nvidia股價連日向下而睇淡美股，Nvidia過去一段時間升幅非常誇張，見頂後投資者開始離場亦唔出奇，關鍵係資金徹底流走，還是純粹換馬。佢又話，雖然Nvidia股價昨晚(24日)大跌，但其他股份喺低位都有支持，亦有唔少股份有得升。
Alex續指，投資者要留意Nvidia跌完之後，有冇資金流入市場，如果其他股份都企得穩，暫時毋須擔心美股，不過，如果Nvidia跌完都冇新資金流入，中短線嚟講，投資者就要小心。
