【Now財經台】Baleno母公司德永佳集團(00321)上周五(21日)出業績後，股價「跳崖式」急挫，今朝(24日)仲未止瀉，一度再挫7.6%，兩個交易日累跌近30%。
股價插水明顯同業績有關，公司月初發過盈喜，雖然最終純利符合盈喜預告，但收入及毛利要跌，而純利有得升主要靠閂咗蝕錢店舖，同埋改善後勤等因素。
另一個推低股價「死因」係財務狀況及派息，截至去年底止，集團現金減少19%至約15.55億，末期息又大削80%，派息比率僅約73%，同過去兩年最少1倍相差好遠，難免令市場擔心。
德永佳股價已跌穿所有主要移動平均線，依家正下試0.86元水平支持，一旦失守，相信要落返之前橫行區，即0.75元至0.8元水平，若以0.75元計，即較現價再跌近12%。
