【Now財經台】市場關注內地新能源產業供應過剩問題。據去年行業統計顯示，產能較需求高出1倍，雖然截至今年4月止，全國風電、光伏裝機已遠超國家全年目標一半，但龍頭信義玻璃(00868)嘅浮法玻璃價格指數繼續尋底，就算裝機量超標，上游均價係咪都好難見底？
紅蟻資本投資總監李澤銘認為，現時上游均價回落至接近底部，但光伏玻璃價格跌勢已持續逾1年，並屢創新低，愈來愈多廠家嘅產品售價跌穿成本價，價格反彈前好難走出經營困境。
Alan又指，依家市場偏好新能源產業鏈下游嘅發電股，棄風棄光率已明顯下降，7月舉行嘅「三中全會」將討論電力改革，相信有關下游產業會進一步受惠，加上股息率回報不俗，預期股價表現續跑贏上游。
光伏板塊暫時未見出現反彈，信義光能(00968)係今日(21日)最弱勢藍籌，股價午後跌逾5%。Alan認為，隨著夏天來臨，發電量上升，股息率平均5厘以上嘅傳統火電股較值博，又話首選華潤電力(00836)。
