【Now財經台】人工智能(AI)概念股當炒，其中，匯聚科技(01729)股價月初以來不停破頂，今日再創3.81元上市新高，最終以接近全日高位收市，收報3.8元，逆市升近8%。
為匯聚科技貢獻逾40%營業額嘅服務器業務算係同AI沾邊，可以應用於數據中心。此外，市傳母公司立訊精密獲得英偉達(Nvidia)GB200相關AI伺服器供應鏈訂單，而立訊嘅大客蘋果公司(Apple Inc.)亦開始構建AI服務器，相信市場亦有憧憬會幫到匯聚科技嘅生意，所以股價升唔停。
匯聚科技年初至今累升逾1.8倍，同Nvidia嘅1.7倍升幅不相伯仲，更大幅拋離「阿媽」立訊精密喺A股嘅8%升幅。不過，股份急升後14天相對強弱指數(RSI)直飆90，屬嚴重超賣水平，成交亦略見縮減。炒AI熱潮揀中呢隻股份，上車之餘要識得睇位落車。
