【Now財經台】世界黃金協會(WGC)年度調查顯示，愈來愈多已發展或富裕國家都傾向未來5年增持黃金儲備。據《金融時報》及《華爾街日報》引述指，57%嘅富裕國家央行預期未來5年黃金儲備佔比將會上升，去年比例約38%。與此同時，呢啲富裕國家央行預期，未來5年會減持美元儲備嘅比例，由去年46%增至56%。
事實上，據國際貨幣基金組織(IMF)指，撇除美元升值影響，全球央行不包括黃金嘅外匯儲備中，美元已自2000年佔70%以上，驟降至去年嘅約55%。據WGC數據顯示，若包括黃金在內，美元佔全球外匯儲備嘅比例已不足一半。
資深銀行家張泰強認為，數據反映部分富裕國家央行對於美元作為央行儲備資產持較負面嘅睇法，並正在尋找有能力代替美元嘅貨幣。不過，喺可見嘅將來，美元作為全球主要儲備貨幣「一哥」冇咁容易被動搖。
市傳長達逾50年嘅「石油美元」協議或迎來終結，美元以後未必係國際石油唯一計價、結算貨幣。張泰強指出，石油係重要嘅戰略物資，1971年美元與黃金價格脫鈎後，美國就係靠呢項協議，令其他國家不得不儲備美元。如果消息屬實，佢認為佔全球外匯儲備21%嘅歐元，有潛力爬美國頭做「一哥」。
