【Now財經台】維他奶國際(00345)今日(20日)中午出咗全年業績，純利大升逾1.5倍，毛利率升至50%，末期息大增3.5倍至6.3仙。睇返農夫山泉(09633)、康師傅控股(00322)及中國旺旺(00151)毛利率，介乎逾30%至逾59%，可口可樂公司(Coca-Cola Co)毛利率則約40%，相比之下，維他奶盈利能力係咪值得加分？集團派息大增係咪可以重新吸引資金？
艾德金融執行董事陳政深指，維他奶維持喺50%水平係正常發揮，雖然較同業高，但值得留意係，唔少企業會將唔同範疇嘅成本歸類為銷售成本，令毛利低咗，繼而拖低毛利率，雖然維他奶毛利率可能係好過可樂，但未必可以直接比較。
Ryan又話，雖然維他奶派息大增，但將增幅除返股價後，又唔可以話好吸引，想收息嘅股東會考慮派息係咪有持續性，因為股息增幅比純利升幅大，市場會擔心維他奶未來嘅發展，同埋派息嘅可持續性，所以增加派息未必可以推高維他奶股價。
