【Now財經台】恒生指數昨日(19日)大升逾500點，今朝(20日)高開23點後，好快就倒跌。好倉資金轉為流出，昨日流出約1.3億元，淡倉方面，連續3日有資金流入，昨日流入約1.3億元，5日合計，有約1.2億元資金坐貨。此外，牛證重貨區上移至17700點，熊證重貨區亦上移至18500點。
恒指昨日大幅反彈後，資金轉為流出，多唔多牛證食糊離場？今朝擺位上有冇出現變？
滙豐亞太區財富管理香港上市產品銷售經理盧貴良指，因為「國家隊」買入港股通央企紅利交易所買賣基金(ETF)，刺激恒指昨日大升，的確有好友趁機食糊離場，但亦有投資者加倉至18000點呢類較貼價嘅牛證，移近啲可以做返高啲實際槓桿。淡倉方面，投資者繼續上移，吸引資金買入熊證，收回價19000點，實際槓桿做到30倍。
CALL輪方面，佢話投資者都做一啲大膽部署，行使價擺20000點以上，博引伸波幅可以進一步上升。
